BREAKING NEWS
latest

728x90

468x60

header-ad

Zanimljivosti

zanimljivosti
Prikazani su postovi s oznakom Ivica Roki. Prikaži sve postove
Prikazani su postovi s oznakom Ivica Roki. Prikaži sve postove

Prijatelji za Ivicu: Red suza, red smijeha...


S projiciranih slika na zidu, pokretnih i nepokretnih, gledao nas je Sine i zapravo sudjelovao u ovoj pjesničkoj večeri "Prijatelji za Ivicu". Dolje se tugovalo, a "odozgo" nas se pozivalo i tjeralo na smijeh... I tako, red suza, red smijeha...

Okupili se sinoć prijatelji da se i dalje druže s Ivicom, s njegovim versima, u kojima je s dubokom emocijom i autentičnim izričajem progovarao o škoju i ljudima, o poju i moru... Svega tu ima; ponajviše ljubavi za svoj škoj, pa lipote sjećanja, tuge, poruge, vica, zlih slutnji ...

Sinoć Ivica nigdje drugo nije mogao biti nego tu, s nama.












Ivica Roki: DEREVERŠO PISMA









[ads-post]

Iznenada preminuo viški pjesnik Ivica Roki


Neočekivano te odnijela smrt. Prerano. Zbogom pjesniče, čuvaru viškog govora i sentimenta... Počivao u miru Božjem!




Ivica Roki na predstavljanju svoje knjige TRESI INTERESI, 2009. godine






KAL HODIĆON

Kal portin do malo
is svita ovega
vami bi tukalo
ostavit se svega

Molojte užonce
carninu butojte
ništa ol krejonce
naprid se forcojte

Sutra, kal hodićon
iz ognja ovega
vi ćete se, znon
ofendit ol svega

Svit ne obadojte
velete kalojte
pok po svitu pojte
i dobro guštojte

Do malo ću, znojte
poć iz vega kraja
is nodon pensojte
na vrota ol raja

I plakot nemojte
ca son pasamenat
nego zakantojte
i jo son kuntenat

Vino svu popijte
dok ne puknu duge
jer kal son rodil se
plakol son ol tuge

Ivica Roki

Rina Repanic-Gotal Bilo mi te je puno drogo slušot. Somo si ti znol onako iskreno, ol sarca izgovorat svoje versi pune jubavi za škoj i ovu misto. "Visu Raju", zove se tvoj libar, a tebi je Roj suđen i na vemu i na otemu svitu. Jer to ti i meritoš. Somo bokun puno rano, jer još je puno ne napisonih pisom, ne izrecenih rici, ne otargoniga grožjo, ne uberenih maslini. Još je puno ne pokozonih crtariji svomu tati Još je puno sitnih koracići koje ćeš vodit i pratit iz Onega svita, a Njuj sa dodiron vitra, otari suzu iz obraza... Svima ćeš non falit, prijateju moj, ali takova je voja Božja. Neka ti svitlost svitli u vike i vječiti mir duši tvojoj. Amen!

[ads-post]

Ivica Roki: Vrabac 2016



1. ZDRAVI BILI JUDI, KALMOJMO SAL VIKU
SKUPA GREMO SUDIT OVEMU COVIKU
OVO JE ZA PLAKOT, NEĆEMO SE SMIJAT
PUNO NON JE OKROJIL POK MOĆA UDIJA
2.PIZDIDU IZ BONDE DA SVE NON JE LINO
A NIMOMO KOMU VEJ PRODAT MAST NI VINO
ZADRUGA JE IŠLA USE, POŠPIJSKO JE SVA NEVOJNA
A NOJVEĆO VINARIJA VEJ ODOVNA JE POKOJNA
3. IŠLI SMO POVIRIT KOL VANJE NA ZAVOD
DOBOTA SE IZVARNULI KAL SMO CULI NAVOD
NA LISTU DANAS JE TOKO NEZAPOSLENIH
VEĆE NEGO JE NA ŠKOJU SKUPA RADNO SPOSOBNIH
4. KAKO NAŠ JURE POKLOD KAL IZI JUTIKU
GRADINA JE POGUCALA ADRIA NAUTIKU
OVAKO ĆE LAGJE MOĆ ISPUNIT SVE ŽEJE
AKO TUKO KOGA JOŠ ŠURGAT OL FAMEJE
5.JOŠ NI VIŠKI NI HARVOSKI NAUCILI NISMO
A VEJ BI NON UVOLILI I ĆIRILIĆNU PISMO
KO GOD DOJDE NOS PODUŠI, BEZ PINKU KREJONCE
ZOBILI SMO SVOJU POVIST, GOVOR I UŽONCE
6.ԬVU NOVITOD SVAK OL NOS JE VEJ ODOVNA CUL
OSNIVO SE NOVO UDRUGA “BAVUL”
VA’ NJIN DAT KURAJA, NEĆEMO IH GOSIT
MA NOS TRI NE VIDIMO CA JOŠ MOGU SPOSIT
7.PENSALI SU SLAVO, SILVANA I STRIŠKO
CA ĆEMO PRODAVAT K’O IZVORNO VIŠKO
JURETU SU RADI TEGA UGRODILI STEND
JER’ ŠPORKICA OL KUCINA NOJVEĆI JE BREND
8.I FUREŠTI CIN ARVAJU VOLTUJU SE PROVON
DI GOD GREŠ UGAZIT, NE MOREŠ OL GOVON
ZOC ĆE IŠPORKUVOT SVOJE SKUPE ŠJOLE
A TEGA PUNI SU JARDINI I KOLE.
9.A TURISTI IZ VAPORA NE DOJDU DO PULTA
MA NA CAKLO OL AUTA VEJ IH CEKO MULTA
ZA PRIVUĆ TURISTE NE FALI NON VIŠĆA
OVI ĆE NON SIGURO DOĆ I DOGODIŠĆA
10.FLOĆALI SU FILKA, FANIJA I FIRE
NA KOJE SVE FEŠTE VA’ BUTAT BANDIRE
NITI JEDON BLAGDAN KOL NOS NI ZA HITIT
SVAKI DRUGI DON SE VAJOMO NAKITIT
11.AKO NOĆU SNIJEŠ PINU OLI TINU
UJUTRO KUMPORE TUKOŠ POĆ NA FINU
TAMO HOĆEŠ NEĆEŠ SVAKO MALO SVROĆOMO
NISU ONE KRIVE CA I AR’JU PLOĆOMO
12.SVAKU MALO OL NOS UCINIDU MONE
HOD U ŠKULU OPITA I PO STORE DONE
TARKALI SU JUMBO, JUBICA I JOLE
FINIT ŠKULU ZA MOĆ KUPIT PAKET VEDRIJOLE
13.KAL GOD JE POTRIBA, KAL PINEZ TUKAJU
UVIK NIKU ŠEMPJARIJU NOVU IZVENTAJU
ZA MOĆ KUPIT KRUHA, NIKO JE VEJ REKA
TUKAT ĆE NON SVIMA ZAVARŠIT ZA PEKA
14.KAL TI KRUH OSTANE OL POL DONA DUŽJE
MORE TI POSLUŽIT SUMO K’O ORUŽJE
AKO ISTI DON GA NE MOREŠ ISTRATIT
SUTRA IS NJIN MOREŠ TOVARA USMARTIT
15.DOBRO ZNODU INGA, IVANKO I ITA
KLUBOVI I UDRUGI JE VEĆE NEGO SVITA
PUNO NJIH SE NIKAL NJANCI NE ISPOTI
MA IMO I ONIH CA NAŠ VIS SRAMOTI
16.A VIŠKI TEJOTAR, PARVI U DARŽAVU
PUNIH OSAN GODIŠĆ NE PASUJE KRAVU
KAL DILIDU PARVO MISTA I ZLOTNE MEDAJE
ONI KVOCU DOMA, ZA NJIH SE NE HAJE
17.ZATO MUZIKONTI GREDU NA POHORJE
A BILO JE DOSTA I DO NA ZOBORJE
GREDU I FAMEJE, SVE ĆE TO GROD PLOTIT
A OVI ĆE NJIMA NA IZBORE VROTIT
18. IMO TOTE MLODIH KOJI OBEĆUJU
MA OVI STARIJI KAKO DA NE CUJU
LAVURAJU, ZNAJU, POKAZIJU VOJU
SUMO KAKO SUTRA FERMAT IH NA ŠKOJU
19.IMO PUNO ARLEKINI, CA PLUTODU SVITON
I NJIMA SE DOJE, ŠAKON I BERITON
A NAŠ SVAK KO VRIDI, TI TUKO DA PROSI
I TAKO SE SILA VESELO UGOSI
20.POTEŠTOTU, MA I VIJEĆU JEDON VELI BOD
PUNO SU NON LIPO OSVITLILI GROD
PROVI GUŠT JE BIT OKUPON SVITLIMA FEROLA
NOJLIPJO JE, ZNO SE, VUKOVARSKO KOLA
21.NOVO CESTA VIS - KOMIŽA NAŠ PONOS I NAŠA DIKA
TOLICIMA OL NOS DOJDE VEĆE K’O NERETVA RIKA
JER’ IZ VISA PUL KOMIŽE, DA NE ĆAPO KOGOD KRIVO
HERCEGOVINA JE DESNO, A BOSNA JE VEĆE LIVO
22.TOKO NON JE DOBAR OVI KAPITALIZAM
DA SE NE ISPLOTI VODE NI TURIZAM
ŠAPJEDU SE EMA, ELIZA I ELI
DA SE ZATVORAJU I VIŠKI HOTELI
23.A KAKO JE NENO FINIL U PENŠJUN
NIKO VEJ NE IGRO BASKET NI BALUN
ŽALOSNO JE DA MU GROD NI DOL BAR PLAKETU
I DANAS ĆE SVIH DOBIT BEZ KALAT JAKETU
24.TROVU SU NON VAZELI I ASFOLT BUTALI
NI TRIDESET GODIŠĆ NISU IZDURALI
IGRALIŠTE ZATVORILO, MA BOLI NJIH PENIS
ZATO NON JE SILA POPULARAN TENIS
25.RED BI BIL PO IMENIMA, NE SUMO ALOĆO
ŽALOSNO JE KOMU SVE GROD LETRIKU PLOĆO
NI NI CUDO CA NOS SEMPRE ĆAPUJU OFONTI
KAL KARITOD DOBIJU UVIK NOJVEĆI ŽIGONTI
26.KONTRALI SMO BUTIGERKE, ANKU I ANELU
PUNO BIDNE LAVURAJU, SVE ZA BAGATELU
LAKO SE JE GOSPODORU BOGATIT I SMIJAT
KOJA GOD TRUHLA OSTANE, IZVARGNE UDIJA
27.JUDI SE RAZBOLIDU POK IŠĆU INEKCIJE
A SVAŠTA KUPUJU I TO JOŠ NA AKCIJE
NABUBOŠ SE ĆEVAPI, POK ZAZIVOŠ BOGE
SAMEJU TI DLAKE, KOPITE I ROGE
28.IŠLI SMO NA INSTITUT PITAT JAKUBINU
KOLIKO JE PLASTIKE U JELNU ŠKARPINU
MA FERMOJMO LAGAT SEBE I TURISTE
JER’ JE NOJZDRAVIJO RIBA OL IĆOTA LANTERNISTE
29.ZOKONE O MORU VA’ UDIJA MINJAT
JER UMORE NEĆE OSTAT NITI STINJA
KAL PRODUJU LIGNJE ISPADU TI OCI
NE ZNOŠ JESU KOŠKE OLI SU LINGOCI
30.IZ VICIJA, IZ OBISTI, OLI IZ POTRIBE
VODE NA SRI MORA SVIT JE ŽEJAN RIBE
SVE JE ISTO JE SARDELA, GIRA OLI SOLPA
KAL DOHODI BORKON LIŽNJOK, KAKO DA GRE POPA
31.DEFORA LANTERNE KAL ARVOJU JAHTE
MOGU ĆUTIT KAKO LIPO VONJU ŠAHTE
KO GOD TO DOŽIVI, IMO MANJU BRIGU
NE TUKO HODIT MU U KOZMO BUTIGU
32.NA VROTA NOS CEKO NASMIJONO ECIJA
GOVORI KOL NJIH JE VELIKO DISKRECIJA
CULI SMO DA TOTE ZAVARTI SE KUNI
ZIMI KURI GUZIC KORTA, A LITI GOLDUNI.
33.OVIMA U PROSVITU FALIDU SVE VIDE
OL DICE CINIDU TEŠKE INVALIDE
FRIGO SE MINISTRE CA SU ONI MOLI
SLOMJENI SE DOMA VUCU KAKO MANAVOLI
34.MA ZA POĆ U ŠĆOPER UVIK NOJDU VOJE
I UVIK SE BUNI ONI KOMU JE NOJBOJE
KAL JE TOKO TEŠKO LAVURAT U ŠKULU
MOGU POĆ MEST PUTE OLI SIĆ KAPULU
35.DA SE POLICIJA NAŠA NE ISPOTI
RED NON JOŠ CINIDU AUTO-PILOTI
A KAL SVAKU MALO STUPIĆI BLOKAJU
MONTIROJ PROPELU I POLET U AR’JU
36.U KOMUNU KAKO DA SU ASTRONAUTI
NE VIDIDU NA STOTINE RAZBIJENIH AUTI
ZALUDU SE ŽALIT, GOVORIT I PISAT
BUTOJTE GARGAŠINU U GRB GRADA VISA
37.ŽESTOKO SE KUNTREŠTAJU MILENA I MIRO
SRAMOTA JE DI SE SVE AUTA PARKIRO
PAMETNO PENSAJU BAMBI, BARICA I BORE
BORZO ĆE SE AUTIMA DIGNUT NA OLTORE
38.U JARDIN OL VINARIJE, NI OPIT SVE CORNO
RESTU EKOLOŠKI SMARDEJKI I TORNO
‘VU LITO SU AUTIMA ZATVORILI VROTA
VELIKO JE, MOJ IVANE, STINJA ‘KOLO VROTA
39.AKO U POŠPILJE GREŠ MASLINE MLIT
DOĆEŠ NA RED, MA TUKO IH DVODESET UMRIT
DOK HARVOSKO VLADA DO JELNU KAZERMU
UJE ĆE I DAJE TEĆ NA TARAFERMU
40.DANAS PUNO DOBRO DOJDE SVAKO KUNA
A NOJBOJE BIT JE TRENER OL BALUNA
ZA TAMO SE UVOLIT TUKO JOKO VEZA
PLOĆODU TE BOJE NEGO REAL BENITEZA
41.MLODI SVE IMAJU, A FOLA TI BOŽE
NOJVEĆE PINEZ SE U BALUN ULOŽE
DOK SIN CINI ŠKROKOJE, OTAC MU SE KESI
SIGUR DA NJEGOV JE MOLI NOVI MESSI
42.I DOKLE SE PINEZE NA SVE BONDE PJUJE
NIKI POK SKONCOJU BEZ VODE I STRUJE
STROH TE RAZBOLIT SE, REBANBIT, OSTARIT
JERBO ĆE TE KAKO MAŠKU NA CESTU OSTAVIT
43.U DOM SU ITILI PROMINIT KATRIDE
ONDA SU IH NAKARGALE VELIKE INTIRGE
DOK’ PUSTI EKSPERTI PO PLAFUNU GMIŽU
VIŠANI ĆE ZA KULTURU TARKAT U KOMIŽU
44.VELU, LIPU ZABAVIŠTE, VELO JE BRAVURA
SUMO KO ĆE CINIT DICU AKO NI LAVURA
ISTO KAKO AMBULANTA, TOVOR BEZ SAMORA
MIROKUL OBJEKAT, MA NINDER LIKORA
45.PITALI SMO KACADURE BARENKO STO PUTI
BOKUN MRIŽE ZA ZAGRODIT ONO MALO FRUTI
DOKLE NJIMA DO MOŽJONI AREVO NAŠ GLOS
ZECI I FAZANE IZIST ĆE I NOS
46.DA SE DROGOJ GOSPI PRIDOCI ZAŠKURI
TE DNEVE CINIDU TURNIR BEŠTIMADURI
KARŠĆANI IZ BONDE GUŠTAJU I PLEŠĆU
KAKO ‘VI IGROVCI RECU KOJU ŽEŠĆU
47.DA NE BUDE SOMU CARNILO U KORTE
VA’ POFOLIT ŠKOVACINE I PICIGAMORTE
UZORE TUKOMO SVI ISKAT U NJIMA
I ANDROTU JER GA NIKAL NI CEKOLA CIMA
48.SILA SMO MODERNI I SVE VEĆE FINI
POK PO KOPOŠONTU GREDU I KUCINI
A DOKLE SVI OLGOVORNI MIRNO KAFE SORCU
ZA REGATU, PO GREBIMA PAVIJANI SKOCU
49.ZA TU JELNU VIŠKU NOĆ,CA CINI SE LITI
STRAHOVITE PINEZE U OGONJ SE HITI
SVAKI PUT SVE GORE, PROVJU PRC I PENJAC
SPOMINJU SE SUMO, BRUJET I PATAKENJAC
50.AKO SE OL SVEGA DOGODI BAR MALO
RUKOVAC POSTAT ĆE NOVI MONTE CARLO
VIDIT ĆEMO JE ISTINA OLI JE MULJAŽA
DA NE BUDE KAKO VERN I TRIKOTAŽA
51.MI SMO SITNO, A VODOVOD VELIKO JE RIBA
IZVENTAJU TI RACUNE OL FRONETA OSIBA
PROVALI SU KREŠIT VODU, UCINIT NOS MONE
TUKO CUVAT UPLATNICE OL BIŽ BIŽ BIŽ NONE
52.JUBOV PREMA NJIMA ODUVIK JE JOKA
SVE VEĆI SE VROĆO BRAĆE SA ISTOKA
KALKULAJU LEDI, LUKICA I LOLO
OPIT ĆEMO TONCOT U ŽIKINU KOLO
53.ZA PUNO NJIH TO JE BIL NOJLIPJI BOMBON
KAL SE BIL POJOVIL HIDRO-AVION
STRAŠIMO SE DA ‘VI NAŠI SUMO TAKO ŠĆECU
I DA ĆE NA ZOLNJU BIT CA INGLEZI RECU
54.A OVI IZ SABORA, CA SVROTIDU OVODE
DOJDU RADI VATRICE, STONCICE, POJODE...
DOK PEDESET VOJNIH PROPADO OBJEKTI
STO GODIŠĆ SE CEKODU KORTE I PROJEKTI
55.UMISTO ŠANPJERIH MI KUSOMO PURU
A KO IMO JACJU POVIST I KULTURU
SVAKI ĆE TURISTA OPITA SE VROTIT
A MI, PIZDE, NIŠTA NE ZNOMO NAPLOTIT
56.NIKE JUDE BI TUKALO SA JURETON UŽEĆ
TOKO SU ARJAVI A NIMOŠ KOMU REĆ
A UMISTO DA URODI OL CESMINE BIJA
CUVODU IH GROD, DARŽAVA, BOG I POLICIJA
57.POK NEKA I MENI, DOBRI BOG OPROSTI
ZLOCINCIMA SEMPRE PUPA, A PRAVEDNI ĆAPO KOSTI
NI U POPE, NI U FROTRE, NI VEJ LAKO IMAT VIRU
PRICESTIDU SVE KARONJE, A POŠTENI SVIT POTIRU
58.DA JE PULITIKA KURBA, ODOVNA SMO ZNALI
DA JE VOKO KURBETINA TO NISMO ŠPERALI
SVI ONI ĆE VEĆE MANJE UGRABIT ZA SEBE
A ZA PROSTE, MOLE JUDE SVIMA NJIN SE JEBE
59. AKO U ŽEP IMOŠ SVE MOREŠ CINIT
I LAGAT I UKRAST PERFIN I UBIT
MOREMO MI TRUMBETAT KOKO NOS JE VOJA
UVIK SVE PODUŠI ZOKON PORTAFOJA
60. ISKUŽOJTE ZA SVE GRUBO CA SMO SAL IZBALILI
I AKO SMO KOGA POŠTENEGA OPARILI
SVI MOREMO, ZNOMO I IMOMO VOJE
FORCOJMO SE POK ĆE SVIMA BIT NON PUNO BOJE

Apel za spas viškog govora


Na promociji božićnog broja Hrvatske zore viški pjesnik Ivica Roki se, u dijelu svog nastupa, založio za spas viškog govora koji polako ali sigurno nestaje. Krivo se piše i govori što bi trebalo biti usporedivo sa svetogrdnim pisanjem slova đ u engleskom jeziku...

Gradonačelnik je pozorno slušao. Može li ova inicijativa uroditi i sustavnim mjerama zaštite i očuvanja viškog govora? Pogledajte i poslušajte! I komentirajte! Izaberite blogger ili facebook, Može i anonimno... Samo nek je pametno i informativno.




Ivica Roki: Vrabac 2015



1. ZDRAVI I VESELI BILI JUDI NAŠI DROGI
PROVAT ĆEMO BIT PRAVEDNI I NE SILA STROGI
TUKO POĆ U REBALTADURE, VAKO VEJ NE MORE
CA NON VEĆE OBEĆUJU NAMI JE SVE GORE

2. OTVORMO VEJ OCI, OLPACOJMO UŠI
RECMO CA NE VRIDI I SVE CA NOS DUŠI.
PUNO GRUBIH ĆETE CUT, A LIPEGA MALO
JER’ SUDIMO JURETU ZA SVE CA NI VAJALO

3. JEMATVA JE LITOS BILA ŽALOST I NEVOJA
NOJGORO OL KAL JE SVITA I OVEGA ŠKOJA.
ZA ISPOSIT DVO, TRI MULA, NISI IMOL ĆONCU
U ZADRUGU SVE JE STALO NA JELNU BALONCU

4. NI SE ZNALO CA JE MORE NI DOKLE JE KROJ
OL VELIKI KIŠI POPLIMOL JE ŠKOJ
PLIJU KUĆE I BUTIGE, SVE U RUKE BOŽJE
MISLILI SU UVEST VAPOR ŽUŽECA – POSTROŽJE

5. NIKI SVIT JE DESET DON BIL U MOKRU GUĆU
A NIKI SU MOGLI BORKIMA KREZ KUĆU
NIKE NISMO ŽALILI GLEDOT KAKO PLIJU
JERBO BIDNE RADNIKE GAZIDU NA ŠIJU

6. U ZADRUGU VIŠKU, KAKO DA SU ZNALI
POK DOBOTA SVU SU KUĆU AFITALI
MA BOLI NJIH, SVITU, NEĆEMO REĆ PROSTO
AFITAT SU MOGLI I ‘NU DESET POSTO

7. HRVATSKE NON VODE NAPLAĆIJU KIŠE
VEĆI SU OL BOGA, TAKO ZOKON PIŠE
KAL IS TUJIH PORTAFOJI LIPO VAZEST ZNAJU
NEKA SAD I ŠTETE JUDIMA REFAJU

8. STRAŠIMO SE SVAKE KIŠE, JUGA OLI BURE
KAL TONCODU KUVERTE, PRAGI, STORE ŠKURE
DVI TREĆINE KUĆ SU PROZNE OL’ MIRINE
SUMO NEDOJ BOŽE DA KOGOD POGINE

9. IS NIKIMA POŠĆERIMA SVAKI DON SVE GORE
NE NOSIDU POŠTU DI MOTOR NE MORE
JOŠ KAL VITAR SVE RASTORCE, TO SU “SCENE NEMILE”
SVIT SE KARSTI I PROZIVO, BLOŽEN DA SI, EMILE

10. NEKA KOGOD RECE SLOVO KONTRA RADICE
PARVI PUT OVODE IMOMO I JASLICE
SUMO ONI CA POPOLNE I NOĆ LAVURAJU
OSTOVJAT ĆE DICU U PRITOR I BAJU

11. MOGLI SU UGRODIT DESETAK VRTIĆI
KOLIKO SU DOLI ZA POPRAVKE STUPIĆI
ZOC ZATVORAT CESTE, PARKINGE I KOLE
BARENKO DO LITA NEKA BUDU DOLE

12. DANAS PUNO JUDI ZNO OTVORAT BLOGOVE
ZA U NEBO DIZOT SVOJE MOLE BOGOVE
ONE PROVE STVORI, MALO KAL SE BIRO
MEĆU SUMO ONO CA NJI KOVENIRO

13. MA JEDON JE BLOGER NAMI U SRI SARCA
TO JE NAŠ MARINKO, TO JE “PROBODACA”
MEĆE SVE CA VRIDI, ZA SVAKOGA SVAŠTA
JERBO JOŠ GA SLUŽI I RAZUM I MAŠTA

14. KAL JE DON OL KACE SVE MI SE ZAŠKURI
JERBO SVE JE MANJE PROVIH KACADURI
NIKI BI TUKALI POKRIT GLOVU VRIĆON
PETNASTE IH TARCE ZA ISTIN ZECIĆON

15. NISU DOLI ERODROM U NOJBOJE MOCE
LOŽJE SU POSIKLI I DONILI OVCE
CUDIDU SE ROŠO, RADOJKA I RADO
NA NOJBOJU ZEMJU DANAS POSE STADO

16. DONILI SU OVCE, DONIT ĆE I KRAVE
VIŠKO VINARIJA SLIKA JE DARŽAVE
NIKO PUSTIH GODIŠĆ NI PRITEGA BRAGU
OSERVOJTE JUDI, SVE JE IŠLO KVRAGU

17. SODIT ĆEMO MARICU I “UKRASNO BILJE”
DOKLE CAGOD PLOTI ZADRUGA “POŠPILJE”
BIROMO BESIDE, MA RECMO BRAT BRATU
PO DVODESET GODIŠĆ NE DOBIJEŠ RATU

18. ODUVIK SMO BILI ŠKOJ DOBREGA VINA
SAL GREMO BRENDIRAT GOVNO OL KUCINA
TUKALI BI JOVIT I ANĆI I BOGI
DI SE GOD VOLTOMO, OL KUCINI STOGI

19. JUCER NON SE ŽALI PLANINORKA RUŠKA
DA SMEĆE HITIJU SVUDAR U SRI BUŠKA
SVE ISTO SE JIDIT OLI PISAT PISME
DOKLE GOD SE KOGA PO ŽEPU NE TRISNE

20. A “LOKALNI ŠERIFI” OL LUKE DO KUTA
GODIŠĆIMA SVAŠTA MEĆU NA SRI PUTA
I MI OVE BESIDE TUKOMO IZMIRIT
JER BOJE STOT KUCO, NEGO SE ZAMIRIT

21. REKLA NON JE TURISTKINJA LALA
DA NON PUNO LIPO VONJE VALA
PUNO SE JE TOTE ISFRAJALO KUNI
BARŽ NON NEĆE OPIT ISPLIVOT MARUNI

22. TURISTIMA NUDIMO DOMOĆU VERDURU
SVE DOMOĆE, SPIZU, VINO, SUMO NE KULTURU
OL MUKE DOMOĆI VA ‘DA SE UBIJU
JER’ NAMI JE DRAŽJE PLOĆAT CIGANIJU

23. NE MOGU NON POMOĆ, NI BOG, NI POP, NI FROTAR
RASPALI SMO MUZIKU, “MARETU”, TEJOTAR…
JERBO SVE ‘NE ŠOLDE CA IMO NAŠ GROD
DOBIJU FUREŠTI ZA SVOJ FALŠITOD

24. NOJVEĆI MOMENAT U OVEMU LITU
NA FORTICU DOŠLI NOJACJI NA SVITU
‘VI DOR JE TUKALO ZAVEZAT FIJOKON
JERBO SVIH JE FORTE POVOLI FARNJOKON

25. ŽALIDU SE NIKI JUDI U LUCICU
DA NEMOGU POLNIT ŠUŠUR NA FORTICU
OL NESPONJO LITI, NIKI SU VEJ PUKLI
NOJRAJE BI GORE KANUNIMA TUKLI

26. TOLICIMA U JUBAVI NIKAKO NE SVIĆE
POL MUŠKIH NA ŠKOJU SPADO U MLADIĆE
NE MORES NA CUNKU UVIK DARŽAT FLASTER
POK U SVE OVO SE UMIŠOL I GANSTER

27. BIL JE PRONT NABAVIT, DA PROSTITE, MONE
I NAŠE, I ŽUTE, MA I KATRAMONE
NEKA MU JE FOLA, OL JE TO BRAVURA
MA NAMI OVODE KRIZA JE LAVURA

28. NAŠ POTEŠTOT NIMO VRIMENA ZA PROVODE
DOSTA MU JE SUMO HODIT NA SVE SPROVODE
STROH NOS JE PROMISLIT DI OVO SVE VODI
PUNO SE UMIRE, A MALO KO RODI

29. AKO ŽENSKA POCNE KISNUT KADA TISTO
ISTEGA SEKUNDA GUBI RADNU MISTO
I SAL CINMO DICU, KAKO DA SMO LUDI
KAL ZOKON JE UVIK KONTRA MOLIH JUDI

30. DANAS SILA MALO SVITA IMO VIZIJU
KAKO GLEDOT A NE PLOĆAT TELEVIZIJU
CIN JE PINKU VITRA BEŠTIMOŠ I PREDOŠ
JERBO PLOTIT MORAŠ I KAL JE NE GLEDOŠ

31. ARVALI SU NIKO VRIMENA PROKLETA
I JUBOV VODIT ĆE PRIKO INTERNETA
OL ZDRAVE CINIMO INBERLONU DICU
PO CILI DON GLOVU IZ ŠKATULI NE MICU

32. PLACEDU U ŠKULU DA JE MOLO PLOĆA
JERBO OL DITETA TEŽJO JE SAKOĆA
ZOC ZARANA DICU TOKO SE UPREŽE
CMIJAJU NA MROVA, CA CICAK POTEŽE

33. STORIJA O’ ‘VERNU’ POZNOTA JE SVIMA
DIGOD DOJDU DVO, TRI TRESIMA OCIMA
A ŽUTO KOLURA NI TOTE BEZ VEZE
IMO BIT DA TO JE SUMO ZA KINEZE

34. KANTALA JE KATE, PLAKOLA JE LINDA
KAL JE PORTIL IVO A DOŠLA KOLINDA
NJU JE LIPO VIDIT, JOŠ LIPJE JE SLUŠOT
MA NJEZINU SPIZU ‘PENA ĆEMO KUŠOT

35. SVI ONI PUNI SU I FORCE I VOJE
ZA RAZMORSIT OVE VELIKE INBROJE
MA ZOLNJIH PET GODIŠĆ, TO PIŠU I FOJE
NIŠTA SE NI PINKE NI MAKLO NA BOJE

36. CA ĆU JO OL SVOGA BIDNEGA TOVARA
KAL DESETAK GODIŠĆ NI VETERINARA
ŽALOSNO JE SVITU, NI DA KOGA HUŠKON
MA TUKO DONIT GA, POK MAKAR I PUŠKON

37. JURETU ŽENA SE SVAKI DON PRIVARĆE
NE OBADO CA NJI DIGOD PUKNU GAĆE
JERBO NAŠ GROD LIPI IMO, FOLA BOGU
TANAC I PILATES I ZUMBU I JOGU

38. PRIZNAT ĆETE DA MI NI NI OVA LUDA
KAL IZ GREBA DOJDEŠ U SRI HOLLYWOOD-A
NI POTRIBA PUNO, MA DOSTA JE UNCA
ZATO PALAC GORE ZA GALIĆA GLUMCA

39. SVAKAKE BESIDE UŠI SU NON CULE
POK NOJPRI POFOLMO SVE MEŠTRE OL ŠKULE
ZNOMO STO JAZIKI FUREŠTI I VLAŠKI
MA SMO DEKAPOTO ŠTRAKURILI NAŠKI

40. IS OLTORA SEMPRE SVAKU MISU VICU
NA ‘VE CA UBIJU NEROJENU DICU
KAKO RASPOZNAVOT MATERE I OCE
KAL SVE MANJI ZNO SE KO NA KOGA SKOCE

41. JURETU POKLADU VELO JE EREKCIJA
KAL JE GOD PO ŠKOJU DRŽAVNO INSPEKCIJA
RED IH JE UDIJA ISKUHOT U TEĆU
JER’ GULIDU PRAVEDNE A MUTNE NE KREĆU

42. TUKOMO SPOMENUT BOKUN I “GRADINU”
ZA MIR NAŠIH MORTVIH NI PINKE NE BRINU
KAL VEJ ZNODU PITAT ZA KOPOŠONT PLOĆU
BARENKO BI MOGLI ZAKLOPAT GA NOĆU

43. U KOMUNU SVITA NEZNOMO NI BROJA
DOJDU I IZOJDU KAL JE KOGA VOJA
AKO TUKOŠ CO UNUTRA, OBLIJE TE POT
DOK’ ISHODIŠ JELNU KORTU PASO TI ŽIVOT

44. KO JE VODE PAMETAN A KO JE CUKUN
NOJVEĆE PINEZ SE DOJE ZA BALUN
TO SU VELE STVORI I PUNO NJIN FOLA
NEKA REKREJO SE SVIT OL DVO KVINTOLA

45. A ZOC SVAKU MALO VATROMET CINI SE
KAKO DA SMO, REDON, SVI DICA OL SISE
KOLIKO SE ŠOLDI HITILO U AR’JU
VEJ SMO MOGLI IMAT MARINU U PARJU

46. COVIK PADE, RAZBOLI SE, UMIRE U RANE
MA OŠPIDOL NIMO MISTA ZA BIDNE VIŠANE
AKO TAKO NIŠTO DOŠKOŠ, ONDA JURE BRATE
STAV GA, KAKO POPRI MULA, DIGOD NAVAR RAPE

47. NAŠ JAZIK JE OŠTAR DA BIŠ SE POSIKA
ŠAJU NON RACUNE PASONIGA VIKA
A KO NEZNO CA JE UMJETNO OPLODNJA
NEKA PITO FIRMU VODOVOD – ODVODNJA

48. JEDON OL NOJVEĆIH KARPEJI ZA ŽEP
TO NON JE NAŠ DICNI I POŠTENI HEP
NI DROGI BOG NE ZNO KAKO SE TO PLOĆO
JER’ UNAPRID ŠAJU I TO JOŠ ALOĆO

49. A ZA U SRI VALE ZADARŽAT IDILU
ZA RUGLO DARŽIMO PROZNU “ČEŠKU VILU”
OBEĆOLA JE ODOVNA MINISTRICA BERTA
TUKO CEKOT JOŠ POL VIKA DA PADE KUVERTA

50. KREZ SUZE NON PROVJE TRUDNI TEŽOK DRAGO
DA ĆAPOL JE DRUGEGA, DI NJEGOVO TARGO
POLICJOT PALUNKO DOŠAL JE ZA NIŠTA
KOL NOS SU LUPEŽI “ZAŠTIĆENA VRSTA”

51. DOŠLA JE KOMIŽA, POJA, KUT I LUKA
KAL JE BILA VELO FEŠTA OL HAJDUKA
PUNO SE PROVJALO, KANTALO, GORILO
BOKUN ZAIGRALO I DEPJU IZILO

52. JOŠ JELNU JE FEŠTU OTVORIL ŠJOR VICE
PUNIH KVARAT VIKA VIŠKE “BANDIRICE”
KAL ZA LITNJU LIGU NIMO DOBRE JEŠKE
NOJVEĆI SU TIMBAR OSTAVILE ŽENSKE

53. KO SLUŠO EVROPU I ‘VE IZ SABORA
BIĆE GLODAN RIBE ‘VODE NA SRI MORA
HOĆE OTI ISTI GLOBIT TALIJONCA
KAL JO NE SMIN ZA VECERU PRIVARIT DVO KONCA

54. OSNIVOMO UDRUGU ZA SVE KREATIVCE
CA NEZNODU NI DI NJIN JE RAPA OL GUZICE
JELNI ĆE POTEGNUT A DRUGI POVUĆ
JERBO TUKO SUMO PINEZE IZVUĆ

55. JUDI BEZ LAVURA, PINEZ I ŽURNOTE
MOGU POĆ NA KORTE, NA BALUN, BALOTE
BURDIŽAT PO VALI I JIDRIT PO KRAJU
JER’ ONI BARENKO VRIMENA IMAJU

56. I JOŠ NIŠTO VAŽNO, JER’ IMOMO MUDA
POSEREMO SVU PRAVEDNOST OL HAŠKEGA SUDA
SVI SE KUNU U POŠTENJE I U OBROZ CISTI
A NJIMA SU ŽRTVE I ZLOCINCI ISTI

57. CEKODU NOS NIKE VELIKE REFORME
GULAŠ, ULTRA PARTI I NAFTNE PLATFORME
AKO NAŠA VLADA ZA TO SE IZBORI
BOJE HITIT FULMIN NEKA SVE IZGORI

58. POTEŠTOT JE U OPĆINU NOJVAŽNIJO VIDA
STRAŠIDU NOS DA GA CEKO SABORSKO KATRIDA
AKO PORTI ON I ‘VA NJEGOVA VLADA
MI TRI ĆEMO KANDIDIRAT JURETA POKLADA

59.  AKO TUKO OVI VRABAC PASAT I REVIZIJU
MI CETIRI GREMO DRETO I NA TELEVIZIJU
POK DOKOŽMO KO JE PROV A KO JE U KRIVU
MI IŠĆEMO; SUMO DOJTE JUDIMA DA ŽIVU

60. NEĆEMO SE ISKUŽOVAT CA SMO BILI GRUBI
I NEĆEMO SEMPRE TONCOT KAKO DRUGI TRUBI
MOĆA SKUPA, PUNON FORCON ĆAPAT PROVU ROTU
DOBRO STOJTE I NEMOJMO CEKOT ZOLNJU BOTU.

Oznake

Adsense aerodrom Anatomija otoka Anči Fabijanović Anela Borčić ankete apartmani vis arheologija arhitektura baština BaVul bike video Biševo blog blogosfera boćanje Bogoljub Mitraković Boris Čargo Boško Budisavljević brodovi crkva crna kronika čestitke Češka vila dizajn Dobrila Cvitanović Dom starih don Ivica Huljev don Milan Šarić Don Paulin Draga Vojković Cepotova društvene mreže Dunja Bezjak ekologija fešte film Firefly 8SE 4K flora foto vremeplov fotografija fotomontaža galeb gastro generacije glazba Goran Mladineo grad grad-objave gradonačelniik gradonačelnik Gradsko vijeće Hajduk HEP HGG Vis HPD Hum Hrvati u svijetu Hrvatska Hrvatska zora humanitarne akcije humor HVIDR-a in memoriam Ivica Roki Ivo Radica Iz drugih medija Jakša Fiamengo jedrenje Joško Božanić Joško Repanić Kalambera kalendar kartanje kazalište kino književnost Komiža komunala korona košarka kriket Kućani kućni ljubimci kultura Kut laptop Acer Lavurat za poja likovna umjetnost limuni lokacije ljudi m/t Lastovo Mamma mia 2 Matica hrvatska medijski ponedjeljak Metković mladi Modra špilja more MUP najava događanja naslovnica Natalia Borčić Nevio Marasović Nikola Kežić Nikša Sviličić NK NK VIS nogomet Norway novo obrazovanje oglašavanje oružje osmrtnice osobno OŠ Vis otoci otok otok Vis pčelarstvo Petra Kapor planinari ples Podšpilje poklod Pokret otoka polemike politika poljoprivreda pomorci portret posao povijest poznati priroda promet promo Prostorni plan PROVISLO Ranko Marinković razgovor reportaža restoran "Val" restorani-konobe ribe Rodoslovlje Rogačić ronjenje Rukavac Siniša Brajčić Slavomir Raffanelli slider sobe Split sport Srebrna Srećko Marinković SŠ AMK stare kartoline Stipe Vojković svijet škola škrinjica Tihana Skerbić time lapse tradicija trajekti trčanje turizam udruga Svima unučica urbanizam USA uvale veja Veljko Mratinić Brojne VERN' Vesna Bučić video video razglednica video vijesti vijesti vijesti vis vinogradarstvo Vis viški govor viški plivački maraton vjenčanja Vjerni Visu Vodovod i odvodnja vrijeme vrtić Vukovar zabava zanimljivosti zdravlje zdravstvo Zima na otoku znamenitosti Ženaglava životinje žutilo